ډېری والدین د خپلو ماشومانو خراب لیک ته اندېښمن وي او د ښه والي هڅه یې کوي، دلته ۵ داسې لارې چارې درسره شریکوو چې په عملي کېدو به یې ماشومان ښکلی لیک یا خط ولري.
مناسب چاپېریال
ډاډ تر لاسه کړئ چې ماشوم مو د خط کښلو پر مهال مېز ته کښېني نه پر ځمکه. مېز ته کښېناستل له ماشوم سره مرسته کوي چې په ښه حالت کې و اوسي، نامناسب حالت د فشار او عضلو کشېدو لامل کېږي او د ماشوم ثبات تر اغېز لاندې راولي.
د قلم یا پنسل نیولو څرنګوالی
د قلم یا پنسل سم نیول د ماشوم د ښکلي لیک کښلو لامل کېږي، ماشوم باید قلم یا پنسل په دریو ګوتو (بټه ګوته، شهادت ګوته او منځنۍ ګوته) ونیسي.
مناسب کاغذ
د کرښو لرونکو کتابچو کارول له ماشوم سره مرسته کوي چې توري او جملې په سمه توګه ولیکي.
ورو/کرار لیکل
ورو یا کرار خط کښل ستاسې له ماشوم سره مرسته کوي څو پر دې کنټرول ولري چې توري او جملې چېرې پیلېږي او چېرې پای ته رسېږي، د دې تر څنګ د لیکلو پر مهال د تېروتنو او غلطیو کچه هم کمېږي.
خط کښل په یوه بوختوونکي فعالیت بدلول
خپل ماشوم مه اړباسئ چې تل سخت تمرین وکړي، هغه ته اجازه ورکړئ چې رسم وکاږي، د جملو تش ځایونه ډک کړي، اضافي تمرین له هغه سره مرسته کوي څو د قلم یا پنسل سم نیول زده کړي او د ښکلي لیک کښلو ظریف مهارتونه یې لا ډېر شي.