ويسا اکاډمي خپل کار له کرايي ودانۍ پيل کړی خو هیله لري چې د وخت په تېرېدو به ځانګړې ودانۍ ولري چې د ماشومانو د ښې زده کړې، لوبو، غونډو او اړوندې نورې اسانتياوې په کې چمتو شوي وي. اکاډمي په پيل کې ابتدائيه (Primary) وه، وروسته منځنۍ (Middle) او د څه له پاسه لسو کلونو په تېرېدو عالي (High) بڼه خپله کړې ده. ويسا اکاډمي په کندهار کې لومړنۍ ښوونيزه اداره ده چې ماشومانو ته د ملي نصاب تر څنګ اکسفورډ نړیوال نصاب تدريسوي. ویسا اکاډمي د زده کوونکو د معياري زده کړو په موخه مسلکي ښوونکي په دندو ګومارلي دي. ویسا اکاډمي د کمپيوټر او ساينسي مضامينو زده کړو ته ځانګړې پاملرنه کړې ده. اکاډمي ساینسي لابراتور، کمپیوټر لیب او کتابتون لري چې د مطالعې، مشاهدې او تجربو اړوند ټولې اسانتياوې په کې په پام کې نیول شوي دي. په اکاډمي کې عامه نظافت (Hygiene) ته ډېره پاملرنه کېږي او د زده کوونکو د روغتیا پالنې په موخه کلینک او روغتیال پال لري. د اکاډمي نظم، سيکوريټي او ساتنې ته ځانګړې پاملرنه کېږي. اکاډمي د زده کوونکو د لا ښې ودې په موخه وخت په وخت بېلابېلې غونډې، مناظرې او ذهني سيالۍ جوړوي چې د زده کوونکو والدين هم ورته راغوښتل کېږي څو هغوی د خپلو اولادونو استعدادونه په خپلو سترګو مشاهده او د ادارې پر وړتياوو او فعاليتونو باوري شي. د ښوونې او روزنې تر څنګ د ماشومانو د سپورټ برخې ته ډېره پاملرنه کېږي، د دې کار لپاره اکاډمي د ناکامورا په نوم د لوبو میدان جوړ کړی دی. اکاډمي په درسونو کې د شا ته پاتې زده کوونکو د ذهني ودې او وړتيا لوړولو په موخه تر غرمې وروسته د ځانګړو کورسونو او دیني زده کړو اسانتیاوې برابرې کړي دي. د زده کوونکيو له والدينو سره يوه ګډه کمېټه (Parents Committee) جوړه شوې ده چې وخت په وخت د درسي بهیر د ودې، د اکاډمي د نظم او د چارو د همږغۍ په موخه غونډې کوي. ويسا اکاډمي د معياري ښوونې او روزنې په لاره کې خپلې تجربې، لاسته راوړنې، مهارتونه او وړتياوې له نورو سره هم شريکوي.

• ماشومانو ته د نوي عصر له غوښتنو سره سم په اسلامي او عصري معيارونو (High Standard Quality Education) برابرې زده کړې ورکول. • د زده کوونکيو ټولنيز اخلاق جوړول. • د زده کوونکيو لپاره د زده کړې ښه چاپېريال. • د ښوونې او روزنې په نړيوالو علمي او پرمختللو مېتودونو د ښوونکو روزل. • په پايله کې ټولنې ته د خدمت په موخه په اسلامي، ملي او علمي روحيه روزل شوي اشخاص وړاندې کول. • په ټوله نړۍ کې د ګران افغانستان نوم روښانه کول او د پرمختللو هېوادونو په کتار کې درول.